1-----------------------------------------------------------------------

ايچي انˇ  گوليا  دخشاردي .

 انˇ دسان لس بو وصاف  هچين اينفر منستن كي خواب ˇ درون را شئوندره

جلويا نيشان دئي .   

جيرا  نيگا نوكودي ، ترسه اي   گيج گيجي بوخوره  و بكفه . پاتوك پاتوك شوئي ، ايتا  پا

بازون اويتا پايا  نئي .   ايباركي بئسا ، شايد كي بتنه واگرده  . سخت بو . اما بئوستي .

كي اينفر قايم بزه  انˇ پوشت  و داد بزه : اوهوي  !  تي رايا بوشو .

برزخ واگردسته كي انˇ جواب'  فده  . اما هي كس  نئسابو  .

خب فاندرسته  . باز هي كس  نئسابو .

اما ايتا سنگينˇ نفس ، شايد ايتا سايه ، از زماتي كي رادكفته بو ، خو پوشت ايحساس كودي .

خوفته بو ؟   بايستي خوابˇ جه ويرشته بي  ، اما ترسه اي  كي خواب نبه ، بازون كفتي جير 

 و ...

دِ  ايپچه شئون  راحت' بئوسته بو ، ايحساس بوكوده ايتا كوجه زاك بئوسته ، قديم منستن .

تلارˇ هره  سر شوئي . او زماتان  نترسه ايي ، اما هسا ، نوكونه ايبار انˇ پا جليسكا بوخوره .

پيله ترا  كي  بئوسته بو ، خاندي .

 تي تي ناز وستي خاندي .

خوشان روبرويي  همساده وستي .

       كور جليسكا خوري كفي آب ميان                    آب ترا بره  غازيان  ..............

نوكونه اَ جير غازيانˇ مورداب منستن ببه .  شنا دنستي ، خب دنستي  .

 اما اگر كي  سنگ و كلوخ ببه چي ؟ شايد سرˇ امره  امويي جير ، شايد هم خو بالˇ سر كفتي .

اما  نه . ترسه اي .

او  سنگينˇ  تام  بشكفته و صيدا  بيشتاوسته ، ايبارده  وگردسته ،

 ايتا فيسقالˇ نور سوسو زئي .

چن تا  آشنا قيافه بيده كي خوشان سر آرام تيكان دهيد و اينگار كي ايچي گوفتيد . اما نه .

همه تا  ماسك بزبيد  ،  ويشتر بترسه  و  خو قدمان  ايپچه توندا  كوده .

 2---------------------------------------------------------------------------

بيده . ايتا فيسقال  نور'  كي  سوسو زئي ، اما  ايتا  دِ  روبرو  بو . 

خيلي بمانسته بو تا كي فارسه .

و باز  خو قدمان توندترا  كوده  ،   دِ  ترس  فكر  نوكودي  .  دِ  خسته بئوسته بو  . 

خو قدمان  كي  هسا  توندتر  و توندترا  بئوستي  ايشماردي  ،   داد زئي  و ايشماردي .

يك  ،  دو  ،  سه   ......

3--------------------------------------------------------------------------

......  يك ميليون و .....  

فارسِه  .

همه تا جيگا  روشن بو  .  اينگار  كي آخر  اَ خط   بو .    اوشاني  كي  ماسك دشتيد  ،  هسا

انˇ  جلو ايسابيد  و باز  ايچي  گوفتنديبيد  .  بولندتر  گوفتيد اما  معلوم نوبو  چي  گوفتندريد .

ذوق بوكوده . 

ايتا  پيله دشت بو  ، پور   دار  و گول جه  .  بهشتا  منستي  .

بهشت  ! !

اِ   نوكونه  اَن هيزار  رايا   واخبرا  نوبوسته بو  . نوكونه  بمرده بي   و ايا بهشت بو .

و اونم   صراطˇ  پورد  .

خو  آخرين  قدما   قايم  بنه .   دِ  فارسه .  خط  تومام  بئوسته  . باز  ذوق بوكوده .

ايباركي   همه تا  سيا  بئوسته  . همه تا چي سيا بئوسته  .

تيكان نوخورده . نوكونه ايتا چالكا درون دكفه .

و باز  ترس بو  كي  بودووسته  انˇ ديلˇ دورون . 

خو  جيبانا   توند توند  بگردسته  . ننا بو .  چن بار  بگردسته  .

لعنتي !      

فندك'   جا   بنابو  .                                        

                               سينا مدبرنيا     /     29 سيا ما     1583  / رشت

 پاتوك پاتوك : آهسته آهسته  /  بازون(بازين ) : بعد /  ايباركي : يكهو /  برزخ : عصباني  / جليسكا : سُر